هو: الاتحاد الاوربي مركزاليومين ديل على مكافحة الهجرة غير الشرعية. وكل يوم هجره لمن عينه يطلع. واصدر مؤخرا توجيه طويل عريض والتوجيه بلغة الاتحاد معناها قانون وهو مريع ومتشدد زيادة على اللزوم. وهاجمته منظمات كتيرة. بعدين كانو عملو قوات مسلحة مخصصة اسمها فورنتكس. عبارة عن قطع عسكرية بحرية من عدة دول بتحوم في البحر المتوسط عشان تقبض المراكب بتاعة التهريب. دي برضو هاجمتها المنظمات. وجارية فيها بالذات ايطاليا.
بعدين انتقلو لمرحلة تانية وهي عمل اتفاقيات ثنائية مع دول معينة زي ليبيا. وفرضو عليها انها تخت اجهزة انذار مبكر متطورة في الشواطىء بتاعتها لملاحقة سفن تهريب البشر. لانه ليبيا بقت واحدة من اكبر الدول الفيها تهريب ومصر والمغرب وموريتانيا والسنغال
هي: ايوه لازم تهاجم. ليه هو ما يرفع ايدعه عن الدول عشان الشعوب تعيش في بلدها. ما ممكن تضرب وترفع العصايه في بلدك. حرام. ليه اوربا عاوزه تحرم العالم التعبانيين ديل؟
هو: اغلبهم بمشو على ايطاليا واسبانيا وجزر الكناري. طبعا عشان كدة المنظمات سمتها اوربا الحصن
هي: محصننه
هو: عاوزين يعملو نظام حماية حيطان من الدول جنوب المتوسط. واليونان برضو متشجعة جدا جدا في الموضوع خاصة اليمينيين الحاليين. سع التوجيه الاوربي الحالي سمح بحبس المهاجر غير الشرعي لغاية 18 شهر. دا طبعا مالغة وتطرف زيادة على اللزوم
هي: بس اليونان مستهدفه للهجره
هو: والله اليونان لا مستهدفة ولا حاجة. الناس كلها بتعتبرها محطة عبور وبس. اغلب المهاجرين هنا من دول الجوار البانيا وبلغاريا. اها ديل حيعملو معاهم شنو؟
هي: احسن يتحبس في اوربا احسن من بلده. ممكن تقول اليونان عبور وخاصه لهولندا وخلافه
هو: ابدا ما هولندا براها يعني اكراد العراق بمشو دول تانية وكذلك الافارقة. الناطقين بالفرنسي بمشو فرنسا وبلجيكا وكدا
هي: مابيقدروا يمنعوا الهجره ولو قامت القيامه
هو: دا الكلام القلناه. شوفي التطور السىء وين. الهجرة ليست جريمة ولذلك مافي قانون في العالم بيعتبرها جريمة وانما انتهاك لقانون الهجرة. والمنطق بسيط جدا اذ لا يمكن اعتبار حركة انسان من مكان في الارض الى مكان اخر جريمة. الان الاوربيين عاوزين يجرموا الموضوع وعشان كدا بمشو حتة حتة في الاتجاه دا. والا ايه يعني تقولي ممكن اسجن مهاجر 18 شهر يعني سنة ونص
هي: لكن لازم تتهربوا لانه وين الفيز المتوفره عشان تجي بالطياره طوالي. ديل مجانيين. دا كلام ما مقبول طبعا
هو: انا قلت في مقابلة تلفزيونية ووافقوني الناس انك لو عاوزة توقفي الهجرة لازم توقفي اسبابها الرئيسية. والاسباب هي الحرب والفقر. مافي زول بحب يطلع من بلده بس كدا مزاج. لازم تكون في دوافع قوية جدا. ولذلك قلت بدل ما الاتحاد الاوربي يقعد يطلع في التوجيهات الظالمة والمجحفة دي كان المفروض يركز على مسالة التنمية في البلدان الفقيرة عشان تنفتح فرص عمل وبالتالي مافي اي زول حيطلع من بلده
هي: والطلعوا ممكن يرجعوا كمان
هي: الصباح رباح بكره المدرسه طول اليوم للساعه 3 ممكن انوم في الحصه. باي
ليست هناك تعليقات:
إرسال تعليق